Ministri grek i Migrimit, Ioannis Mouzalas, tha se ekzistojnë “gjurmë të fuqishme” se tetë ish-ushtarët turq, që kërkuan azil në Greqi pas grusht shtetit të dështuar të vitit 2016, u përfshinë në përpjekjen për grusht shteti në Turqi, transmeton Anadolu Agency (AA).
Komentet e ministrit Mouzalas erdhën gjatë një programi të transmetuar në kanalin televiziv grek Skai.
Më herët këtë javë, një gjykatë greke pezulloi një dhënie të azilit, të pranuar për njërin nga ushtarët, duke thënë se gjykata do të merrte një vendim përfundimtar për të arratisurin më 15 shkurt.
Süleyman Özkaynakçı, i cili bashkë-pilotoi një helikopter nga Turqia me shtatë ushtarë të tjerë në bord më 16 korrik të vitit 2016, në mëngjesin pas përpjekjes për grusht shteti, i është pranuar azili në fund të dhjetorit nga një komitet i pavarur.
Mouzalas tha se qeveria greke kishte apeluar kundër vendimit të komitetit në mënyrë që të sigurohej se komplotëve të grusht shtetit nuk u është dhënë e drejta për azil.
“Si një shtet i qeverisur nga sundimi i ligjit, ne apeluam kundër këtij vendimi”, tha ministri grek, duke theksuar se ata nuk kishin kundërshtuar “1.500 vendimet e mëparshme”.
“Cili është ndryshimi? (Në këtë rast) Ka gjurmë të fuqishme se këta njerëz ishin komplotë të grusht shtetit”, shtoi Mouzalas.
Duke vënë në dukje se qeveria greke është duke ndjekur një procedurë specifike ligjore në rastin e ish-ushtarëve të kërkuar, Mouzalas tha se fjalën e fundit për këtë çështje do ta thonë gjykatat greke.
– “Të motivuar politikisht”
Janarin e kaluar, Gjykata e Lartë Greke vendosi të mos ekstradojë tetë ish-oficerë në Turqi, në një vendim të Ministrisë turke të Jashtme të kritikuar si “të motivuar politikisht”.
Ministri grek i Drejtësisë, Stavros Kontonis, tha se qeveria do të konsiderojë mbajtjen e një procesi gjyqësor për ata nëse Ankaraja paraqet një kërkesë zyrtare.
Ministria turke e Drejtësisë ka dërguar disa kërkesa për ekstradim për ish-oficerët.
Çështja u diskutua gjithashtu gjatë vizitës historike të muajit të kaluar të presidentit turk Recep Tayyip Erdoğan në Greqi.
Organizata terroriste Fetullah (FETO) dhe udhëheqësi i saj me bazë në SHBA, Fetullah Gylen, orkestruan tentativën për grusht shteti që la të dëshmorë 250 persona dhe rreth 2.200 të plagosur.
Ankaraja akuzon FETO-n se qëndron prapa një fushate të gjatë për të përmbysur shtetin nëpërmjet infiltrimit të institucioneve turke, veçanërisht të ushtrisë, policisë dhe gjyqësorit./Rtv islam/
