Të paktën 18 veta u vranë dhe 16 të tjerë u plagosën në trazirat që shpërthyen në një burg në veri të Hondurasit.
Pasi autoritetet e vendit para disa ditësh shpallën gjendjen e jashtëzakonshme në burgjet në mbarë vendin dhe sollën vendimin që administrata civile mbi burgjet t’i kalojë komisionit të posaçëm nën udhëheqejen e ushtrisë dhe policisë, në burgun e qytetit Tela ndodhi një rebelim.
Zëdhënësi i komisionit që mori përsipër menaxhimin e burgut, Jose Coello, tha se komisioni i ri nuk kishte marrë ende detyrën kur shpërtheu rebelimi në burgun në Tela.
“Të paktën 18 njerëz u vranë në trazira dhe 16 u plagosën. Në burg janë dërguar forcat e sigurisë për të shtypur rebelimin. Lidhur me rastin kanë nisur hetimet”, tha Coello.
Pritet që futja e sistemit të ri të menaxhimit të burgjeve të zgjasë rreth gjashtë muaj, kurse zyrtarët thonë se qëllimi është të zhduket korrupsioni dhe dhuna nga burgjet.
