​Hovenier përfundon takimin me kryetarët e komunave të veriut

Mos i humb

Ambasadori i SHBA-së në Prishtinë, Jeffrey Hovenier zhvilloi sot takim me kryetarët e komunave të veriut në zyrën e BE-së në Prishtinë.

Pasi doli nga takimi, ambasadori amerikan vijoi drejt objektit të Kuvendit të Kosovës. Ndërkohë, kryetari i Komunës së Zveçanit, Ilir Peci dhe ai i Zubin Potokut, Izmir Zeqiri, qëndruan ende në zyrën e BE-së.

Zeqiri dhe Peci vijnë nga radhët e Partisë Demokratike të Kosovës.

Aty nuk janë parë kryetari i Leposaviqit, Lulzim Hetemi dhe ai i Mitrovicës së Veriut, Erden Atiq.

Ky takim ka ardhur si pasojë e situatës së krijuar në veri të vendit.

Përfaqësues të Listës Serbe kanë diskutuar sot me pjesëtarë të KFOR-it. Ata janë takuar afër objektit të Komunës së Zveçanit ku edhe i kanë paraqitur përfaqësuesve të misionit të NATO-s kërkesat e tyre.

Kërkesat e Listës Serbe, të cilat tha se i ka bërë në emër të popullit serb, janë që kryetarët e ri të sapozgjedhur të komunave në veri të Mitrovicës, Leposaviq, Zubin Potok dhe Zveçan të shkojnë në shtëpitë e tyre dhe që njësitë speciale të Kosovës të tërhiqen, raporton KosovaPress.

Mëngjesin e sotëm, grupe qytetarësh serbë janë mbledhur para objekteve komunale në Zveçan, Zubin Potok e Leposaviq, për të kundërshtuar hyrjen e kryetarëve të rinj shqiptarë.

Policia e Kosovës dhe paqeruajtësit e KFOR-it kanë shtuar praninë, ndërkohë që serbët në Zveçan kanë hedhur gaz lotsjellës në drejtim të pjesëtarëve të institucionit të sigurisë së Kosovës.

Po ashtu sot rreth orës 9:00 kryetarët shqiptarë të katër komunave veriore, të dalë nga zgjedhjet e 23 prillit, janë takuar me ambasadorin amerikan në Prishtinë, Jeffrey Hovenier.

Më 26 maj, Policia e Kosovës i ka ndihmuar kryetarët e rinj shqiptarë të Zveçanit, Zubin Potokut e Leposaviqit për të hyrë në zyrat komunale, me gjithë kundërshtimet e ashpra të disa banorëve serbë vendas, që kanë çuar në përleshje me pjesëtarët e policisë.

- ISLAMSHOP.CH -spot_img
- ISLAMSHOP.CH -spot_img

Të fundit