Ish-kandidati i LDK-së për kryetar të Prishtinës, Arban Abrashi, ka reaguar pas vendimit të Gjykatës Kushtetuese, ndaj kërkesës e tij për pretendimet për shkelje të të drejtave zgjedhore në garën me Shpend Ahmetin,për kryetar të Komunës së Prishtinës në zgjedhjket e fundit.
Sipas tij, vendimi i kushtetueses është i turpshëm dhe skandaloz.
“Unë kam kërkuar nga Gjykata Kushtetuese që të konstatoj në bazë të nenit 113.7 të Kushtetutës shkeljen e të drejtave të mia zgjedhore, e jo të më tregoj nëse aktgjykimi dhe aktvendimi i Gjykatë Supreme kanë shkelur nenet 45 dhe 54 të Kushtetutës. TURP!”, shkruan Abrashi në Facebook.
Postimi i plotë i Abrashit:
Si shoqëri e kishim një mundësi për ta ndryshuar dhe rikthyer besimin në institucione. Sidoqoftë, jo të gjitha palët vendosen të luajnë me duar të pastra. Politika vendosi të kundërtën, kurse institucionet e pavarura ranë në kurthën e politikës dhe i’u dorëzuan presionit.
Disa gabime të akvendimit skandaloz janë më poshtë:
Me nenin 112 të Kushtetutës përcaktohet e drejta e Gjykatës Kushtetuese për të intepretuar nëse ligjet janë në përputhshmëri me Kushtetutën.
Në rastin tim, Gjykata Kushtetuese vlerësoi se aktgjykimet e aktvendimet e Gjykatës Supreme nuk janë në kundërshtim me nenet 45 dhe 54 të Kushtetutes. Kjo përbën skandal në vete, e ky skandal e kjo praktikë nuk haset në asnjë gjykatë kushtetuese kur vendos për ankesat individuale, por as në Gjykatën Evropiane për të Drejtat e Njeriut.
Unë kam kërkuar nga Gjykata Kushtetuese që të konstatoj në bazë të nenit 113.7 të Kushtetutes shkeljen e të drejtave të mia zgjedhore, e jo të më tregoj nëse aktgjykimi dhe aktvendimi i Gjykatë Supreme kanë shkelur nenet 45 dhe 54 të Kushtetutës. TURP!
E nderuar Gjykatë, në rast se nuk ke kuptuar: Unë nuk kam kërkuar interpretimin e përpuethshmërisë së ligjit me Kushtetutën, por kam ngritur kërkesën time kundër nje autoriteti publik për cenim të lirive dhe të drejtave të mia kushtetuese.
Me këtë rast kërkoj nga i gjithë komuniteti juridik vendor e ndërkombëtar profesional që të hapet debat për këtë aktgjykim skandaloz.
Hartimi i një aktgjykim me shumë faqe, nuk nënkupton e kamuflon fshehjen e pazarit. Ky aktgjykim skandaloz, përfshin gabime amatore që vetëm letra i duron, por asnjëherë ndërgjegjja e rregullat e profesionit.
Mendoni pak për Kosovë, e të rinjtë qe me mendje janë jashtë saj.
