Përveç ishullit mesdhetar të Siçilisë, edhe rajoni i Pulias është prekur sërish nga zjarret pyjore, që ende po digjen sot në jug të Italisë.
Në provincën e Leçes, një zjarr ka përfshirë disa shtëpi mbrëmjen e së enjtes dhe ka rrezikuar t’i afrohet bregdetit.
Ndërkohë, shtëpitë e pushimit duhej të evakuoheshin.
Në median sociale qarkulluan video të njerëzve që ikin nga flakët që po afroheshin nga plazhi në qytetin Ugento.
”Brigada e zjarrfikësve ishte në gjendje të vinte nën kontroll zjarret më kritike në Ugento në një operacion të gjatë gjatë natës”, thanë zëdhënësit e zjarrfikësve në televizionin italian duke shtuar se situata ishte lehtësuar.
Në Pulia, një fermë u përfshi nga zjarret dhe shumë ullinj u shkatërruan.
”Që nga e diela e kaluar, zjarrfikësit në Italinë jugore – midis Siçilisë, Sardenjës, Pulias dhe Kalabrisë – janë zhvilluar më shumë se 3 200 operacione”, shtoi brigada e zjarrfikësve.
Ndërkohë, zjarrfikësit vijojnë të jenë në alarm në Siçili, ku veçanërisht veriu rreth kryeqytetit Palermo është ende i prekur.
”Megjithatë, gjendja nuk është më aq kritike sa ditët e fundit”, thonë ata.
Të paktën tre persona kanë humbur jetën në zjarret që digjen që nga fundi i javës së kaluar.
Departamenti Italian i Mbrojtjes Civile supozon se një pjesë e madhe e zjarreve janë shkaktuar nga një sjellje e pakujdesshme apo edhe e qëllimshme.
