Izraeli mbrëmë ka kryer sulm raketor në Halep, qytetin më të madh në Siri, njoftoi agjencia e lajmeve SANA, e cila është nën kontrollin e regjimit të Bashar al-Assadit.
“Të mërkurën rreth orës 23:00 mbrojtja ajrore ushtarake interceptoi agresion ajror izraelit”, deklaroi për agjencinë SANA një burim anonim ushtarak.
“Objektivi i sulmit raketor izraelit ishin vende të shumta industriale në rajonin industrial Sheik Najar në verilindje të Halepit. Një numër i raketave armike janë goditur”, shton burimi.
Bëhet e ditur se sulmi ka shkaktuar “vetëm dëme materiale”.
Nuk ka ende asnjë reagim nga pala izraelite mbi pretendimet e tilla.
Lajmi erdhi disa ditë pasi presidenti i SHBA-ve, Donald Trump në Washington nënshkroi vendimin me të cilin njohu sovranitetin e Izraelit mbi Lartësirën e Golanit në Siri.
