Pas një votimi në mënyrë virtuale Joe Biden u zgjodh zyrtarisht si kandidat i demokratëve për zgjedhjet presidenciale në SHBA në natën e dytë të Konventës Kombëtare.
“Faleminderit të gjithëve. Kjo do të thotë botë për mua dhe familjen time dhe takohemi të enjten”, tha Biden nga shkolla Delaware ku gruaja e tij, Jill mbajti fjalimin e saj të martën në mbrëmje.
Në fjalimin e saj gjatë konventës, Jill Biden dëshmoi për karakterin e burrit të saj, duke sjellë një kontakt emocional. Ajo vlerësoi guximin e Biden-it për të vazhduar punën pas humbjes së djalit të tyre Beau.
“Katër ditë pas funeralit të Beau, unë pashë Joe të rruar duke veshur kostumin e tij. E pashë duke u rregulluar në pasqyrë, mori frymë thellë, drejtoi shpatullat dhe doli në një botë të zbrazur nga humbja e djalit tonë. Ai u kthye në punë. Ky është pikërisht ai që është”, tha Jill.
Dita e dytë e konventës filloi me prezencën e figurave të profilit të lartë të demokratëve, përfshirë ish-presidentin Bill Clinton dhe përfaqësuesen, Alexandria Ocasio-Cortez, e cila foli në emër të Biden-it dhe kritikoi presidentin, Donald Trump për trajtimin e tij të shpërthimit të koronavirusit, padrejtësisë racore dhe mohimit të ndryshimeve klimatike.
Ish-presidenti Clinton mbajti një fjalim të shkurtër të filmuar më parë, duke bërë akuza ndaj Trumpit për trajtimin e pandemisë.
“Si u përgjigj Donald Trump? Në fillim ai tha se virusi ishte nën kontroll dhe së shpejti do të zhdukej. Pasi nuk u bë kështu, ai ishte në TV çdo ditë duke u mburrur se çfarë pune të shkëlqyeshme po bënte ndërsa shkencëtarët prisnin të na jepnin një informacion jetësor. Kur atij nuk i pëlqenin këshillat e ekspertëve, ai i injoronte ata”, tha Clinton.
“Vetëm kur COVID-19 shpërtheu në shumë shtete të tjera, ai filloi të inkurajojë njerëzit të mbajnë maska. Deri atëherë, vdiqën shumë njerëz. Kur e pyetën për rritjen e vdekjeve, ai u tërhoq dhe tha: ‘është ajo që është’. Por, a duhej të ishte kështu? Jo. COVID-19 na goditi shumë më tepër sesa duhej”, tha ai.
Clinton pastaj deklaroi se SHBA janë e vetmja ekonomi e madhe industriale që shënon trefishin e nivelit të papunësisë, që prej fillimit të pandemisë së koronavirusit.
Një nga temat e shfaqura gjatë konventës ishin edhe republikanët që kanë folur për arsyet se ata besojnë se vendi duhet të mbështesë Biden-in, përfshirë edhe ish-sekretarin e Shtetit, Colin Powell.
“Joe Biden do të jetë një president që ne të gjithë do të jemi krenarë të përshëndesim”, tha ai gjatë një video-mesazhi. “Me Joe Biden-in në Shtëpinë e Bardhë, ju kurrë mos dyshoni se ai do të qëndrojë me miqtë tanë dhe do të qëndrojë përballë kundërshtarëve tanë – assesi ndryshe”, tha Powell.
Sally Yates, ish-ushtruese e detyrës së Prokurorit të Përgjithshëm në administratën e Trumpit, e cila u pushua nga puna pasi refuzoi të zbatojë ndalimin e Trumpit për udhëtime nga një grup i vendeve me shumicë muslimane, gjithashtu kritikoi Trumpin.
“Ky ishte fillimi i sulmit të tij të pamëshirshëm ndaj institucioneve demokratike dhe punonjësve të panumërt të përkushtuar publik”, tha ajo.
Mesazhin kryesor të së martës e dhanë anëtarët e gjeneratës së re të partisë, përfshirë demokratin nga Xhorxhia, Stacey Abrams dhe drejtuesit vendorë si republikani i Pensilvanisë, Malcolm Kenyatta, senatori i shtetit të Karolinës së Jugut, Marlon Kimpson dhe senatorja e shtetit Nevada, Yvanna Cancela.
Biden është caktuar të pranojë nominimin në një fjalim të enjten.
