Arrestohet Christos Papas, numri 2 i organizatës ekstremiste të djathtë “Agimi i Artë” (tashmë e jashtëligjshme), i njohur si nënkryetari dhe frymëzuesi i ideologjisë së kësaj organizate kriminale greke.
Fashisti 59 vjeçar ishte në kërkim nga policia greke nga 1 tetor 2020, kur me vendim të drejtësisë greke
“Agimi i Artë” u shpall organizatë kriminale dhe gjithë anëtarët e kryesisë u dënuan me burg, përfshi liderin Nikos Mihaloliakos dhe deputetin e Parlamentit Europian, Janis Lagos.
Megjithëse kishte shumë hipoteza se Christos Papas ishte arratisur nga Greqia e kërkohej në një manastir të Serbisë, në fakt krimineli tashmë i dënuar për aktivitet kriminal fshihej në zonën Zografu të Athinës, shumë afër qendrës, ndërsa shpenzimet e tij i mbulonte një grua 52 vjeçare nga Ukraina, mike personale dhe anëtare e “Agimit të Artë”.
Sipas policisë greke, që vëzhgonte apartamentin prej 1 muaji, sapo i ranë ziles Papas duket të jetë përgjigjur menjëherë “Një sekondë, po zbres. Dhe ta dini, këtë muaj kisha planifikuar të dorëzohesha”.
Christos Papas është dërguar në Prokurorinë e Dënimeve të Athinës për seancen e shpalljes së dënimit dhe transferimin në burgun e Dhomokos.
