Në drejtimin e kryetares, Jorida Tabaku, Komisioni për Çështjet Europiane shqyrtoi projektligjin “Për vlerësimin strategjik mjedisor”.
Të ftuar për këtë projektligj ishte zëvendësministrja e Turizmit dhe Mjedisit, Almira Xhambulla dhe stafi shoqërues.
Në prezantim të këtij projektligji zëvendësministrja u shpreh se, qëllimi i ndryshimit të ligjit është që të sigurojë realizimin efektiv të funksioneve publike administrative në shërbim të institucioneve apo grupeve të interesit dhe publikut, si dhe mbrojtjen e të drejtave dhe të interesave të ligjshëm të tyre.
Relatorja e çështjes, Pranvera Resulaj tha se, ky projektligj nuk ka për qëllim përafrimin e legjislacionit me Acquis Communautaire.
“Ndryshimi i propozuar lidhet vetëm me unifikimin e terminologjisë dhe harmonizimin e legjislacionit të brendshëm bazuar në ndryshimet që ka pësuar dhe nuk prek në thelb direktivat.”, theksoi Resulaj.
Pas diskutimeve, anëtarët e komisionit e miratuan këtë projektligj në parim, nen për nen dhe në tërësi.
Po ashtu, komisioni shqyrtoi edhe projektligjin “Për disa ndryshime në ligjin nr.9917, datë 19.5.2008, “Për parandalimin e pastrimit të parave dhe financimit të terrorizimit”, të ndryshuar””, nismë e deputetit, Klevis Xhoxhi.
Xhoxhi, i ftuar për prezantimin e këtij projektligji, tha se, ky projektligji ka në vetvete disa ndryshime të cilat i janë dërguar për miratim Këshillit të Ministrave.
Relatorja Etilda Gjonaj në fjalën e saj u ndal tek tre çështje që lidhen me direktivat, të cilat u diskutuan dhe komentuan bashkë me anëtarët e tjerë të komisionit.
Pas pyetjeve, sugjerimeve dhe komenteve, me ndryshimet e dakordësuara gjatë diskutimit në komision, anëtarët e komisionit e miratuan këtë projektligj në parim, nen për nen dhe në tërësi.
