Privilegjet e Qeverisë “Haradinaj” nuk kanë të ndalur. Pasi ua rriti pagat, kryeministri është përkujdesur që udhëtimet e këshilltarëve politikë jashtë shtetit të bëhen me sa më pak procedura.
Kësisoj, fundvitin e kaluar nxori vendim përmes të cilit këshilltarëve u mundësohej të pajiseshin me pasaporta diplomatike.
Bartës të institucioneve paguajnë dhjetëra këshilltarë nga kuleta e shtetit në këmbim të lojalitetit që tregojnë ata për partitë në pushtet. Rritja e numrit të dikastereve qeveritare ka bërë që të rritet edhe numri i këshilltarëve për bartësit e tyre, shkruan koha ditore.
Derisa Ministria e Punëve të Jashtme (MPJ) nuk ka treguar sa këshilltarë kanë aplikuar për t’u pajisur me pasaporta diplomatike, në Zyrën e Kryeministrit kanë thënë se janë veç 15 zyrtarë që mund të pajisen me dokumente të tilla./Kosova Post/
