Në Spanjë, një protestë u mbajt në kryeqytetin Madrid për të tërhequr vëmendjen ndaj problemit të migrimit drejt qyteteve të mëdha, i cili sa vjen e rritet në vitet e fundit për shkak të mungesës së infrastrukturës dhe punësimit.
Mijëra njerëz janë mbledhur në qendër të qytetit të Madridit nën organizimin e 90 organizatave joqeveritare në 23 rajone, kryesisht Soria dhe Teruel dhe kanë marshuar me pankartën “Kthim në Spanjën e boshatisur”.
Me sloganin “Tashmë nuk mjaftojnë premtimet, kërkojmë veprime dhe investime” spanjollët morën pjesë në protestën e cila ishte e rëndësishme nga pikëpamja për të sjellë për herë të parë në rendin e ditës problemin e migrimit drejt qyteteve të mëdha në Spanjë.
Përfaqësues nga organizatat joqeveritare si “Soria Ya!” dhe “Teruel Existe” kanë theksuar se nga politikanë presin investime kryesisht në infrastrukturën e trenit të shpejtë dhe turizmit lokal.
Sipas të dhënave të Institutit Kombëtar të Statistikave të Spanjës (INE), pakësimi i popullsisë në 14 qytete në vend thuhet se është në një nivel “kritik”. Rreth 80 për qind e fshatrave dhe komunave të këtyre qyteteve ku popullsia është më pak se një mijë persona ballafaqohen me rrezikun e zbrazjes së plotë.
