Më shumë se pesë muaj pas fillimit të programit të administratës Trump, të quajtur “Qëndro në Meksikë”, asnjë azilkërkues nuk ka hyrë në SHBA, ndërkohë që migrantët luftojnë për gjetjen e një përfaqësues ligjor, sipas një raporti të ri.
Raporti i lëshuar nga Zyra e Regjistrimeve Transaksionale (TRAC) – në Universitetin e Sirakuzës – tregon të dhënat e gjykatave të ngarkuara për migracionin, nga janari deri në fund të qershorit.
Studiuesit zbuluan se nga 1 155 çështjet e ngritura në Meksikë, vetëm 14 prej tyre kishin përfaqësim ligjor, domethënë vetëm 1,2%.
“Është e qartë se shumë pak azilkërkues, të cilët janë të detyruar të qëndrojnë në Meksikë, kanë qenë në gjendje të garantojnë përfaqësimin e tyre për procedurat e ardhshme të imigracionit”, thuhet në raport, transmeton ATSH.
Në gjykatat e ngarkuara për migracionin, qeverisë nuk i kërkohet t’u ofrojë aplikantëve këshilla juridike falas.
Migrantët kanë të drejtën e një avokati për aq kohë sa ata mund të përballojnë shpenzimet për të ose të gjejnë një tjetër, i cili të paraqesë falas kërkesat e tyre.
“Përfaqësimi ligjor rrit shumë shanset për të marrë azil. Të dhënat tregojnë se aplikantët e përfaqësuar nga avokatët kanë gjasa pesë herë më shumë të marrin azil sesa aplikantët pa ta”, sipas TRAC.
