Mbi 40 persona kanë vdekur në Algjeri, Itali dhe Greqi pasi zjarret po kërcënojnë rrezikshëm fshatrat dhe vendpushimet, ndërkohë që mijëra të tjerë janë evakuuar.
Greqia po përgatitet për më shumë fluturime evakuimi nga Rodosi, pasi zjarret po shpërthejnë edhe në ishujt e Korfuzit dhe Evias.
Vala e gjatë aktuale e të nxehtit nuk po ndalon, me temperatura që priten të rriten mbi 44 gradë Celsius në disa pjesë të Greqisë.
Zjarret në Siçili dhe Pulia kanë detyruar mijëra njerëz të largohen.
Numri më i madh i vdekjeve deri më tani është në Algjeri, ku te 34 viktimat përfshiheshin 10 ushtarë të rrethuar nga flakët gjatë një evakuimi në provincën bregdetare të Bejaia, në lindje të Algjerit.
Bejaia është zona më e goditur, duke llogaritur 23 nga vdekjet, raportojnë mediat lokale.
Autoritetet algjeriane thanë se 80% e flakëve ishin shuar që nga e diela, por një përpjekje masive për shuarjen e zjarrit vazhdon, me personel të shtuar, qindra makina zjarrfikëse dhe disa avionë.
Zjarret kanë shpërthyer edhe në Tunizinë fqinje, ku 300 persona u desh të evakuoheshin nga fshati bregdetar Melloula.
Në Greqi, Ministria e Mbrojtjes Civile paralajmëroi të mërkurën për një “rrezik ekstrem” zjarri në gjashtë nga 13 rajonet e vendit.
Një ekip shkencëtarësh të klimës – grupi World Weather Attribution – tha se vala e të nxehtit intensive të këtij muaji në Evropën Jugore, Amerikën e Veriut dhe Kinë do të ishte praktikisht e pamundur pa ndryshimet klimatike të shkaktuara nga njerëzit.
Dy pilotë vdiqën në ishullin Evia, në veri të Athinës, kur avioni i tyre zjarrfikës ”Canadair” u rrëzua në një luginë.
Diku tjetër në ishull, trupi i djegur i një burri u gjet në një kasolle.
Në ishullin Rodos më shumë se 20 000 njerëz janë evakuuar nga shtëpitë dhe vendpushimet në jug ditët e fundit.
Një zyrtar i aeroportit tha se më shumë se 5 000 persona kishin fluturuar për në shtëpi në më shumë se 40 fluturime urgjente midis të dielës dhe të martës
