Ministrja e Integrimit Europian, Dhurata Hoxha, përsëri është deklaruar rreth liberalizmit të vizave.
Ministrja e Integrimit Europian, Dhurata Hoxha, në takimin që ka pasur me ministrin e Mjedisit, Fatmir Matoshi, ka folur edhe për liberalizimin e vizave.
Ajo tha se Kosova është afër në këtë proces, por që kjo nuk mund të ndodhë deri pas përfundimit të zgjedhjeve në Parlamentin Europian.
“Ka ende punë sepse shtetet anëtare nuk dëshirojnë të marrin një vendim para se të përfundojnë zgjedhjet në PE. Kriteret për liberalizim janë përmbushur, tani jemi në hapin e fundit dhe në takimin e qershorit të Këshillit të Ministrave të kemi një vendim. Duke parë se jemi në prag të zgjedhjeve të PE-së asnjë nga shtetet anëtare nuk dëshirojnë të diskutojnë për liberalizim para zgjedhjeve të PE-së”, tha ajo.
Hoxha foli edhe për raportimet se Kosova ka humbur 43.4 milionë euro nga fondet e BE-së, por, ajo tha se Kosova nuk ka humbur asnjë cent dhe se si vend janë në rrugë te mirë për përfitime tjera nga Fondi i Bashkimit Europian.
“Sa i përket fondeve të BE-së dua të ritheksoj se nuk kemi humbur asnjë cent. Kosova është përfituesi më i madh në rajon i fondeve të Bashkimit Europian. MIE është në proces të koordinimit të plotë”, tha ajo.
