Qarkullimi në Aeroportin e Cyrihut ka pësuar mjaft shumë edhe nga vala e dytë e koronavirusit, në nëntor.
Pasi numri i pasagjerëve kishte rënë në shtator dhe tetor, rënia e tij krahasuar me vitin 2019 u bë edhe më e ashpër në nëntorin tradicionalisht të dobët, shkruan srf.ch.
Krahasuar me muajin e tetorit, numri i udhëtarëve të trajtuar në këtë aeroport, praktikisht është përgjysmuar.
Në nëntor, përmes Aeroportit të Cyrihut kanë fluturuar 245.187 pasagjerë, ka njoftuar të enjten operatori i aeroportit.
Kjo ishte 89 për qind më pak se në nëntor të vitit të kaluar.
Trendi në rënie është përshpejtuar përsëri me një ritëm të theksuar krahasuar me dy muajt e mëparshëm.
Aeroporti i Cyrihut është më i madhi në vend, gjegjësisht më i madh se dy aeroportet tjera ndërkombëtare (Gjeneva dhe Bazeli) së bashku.
Ai konsiderohet si porta më e madhe për qarkullimin e udhëtarëve në Zvicër dhe nga Zvicra.
