ONM kundër kreut të Kushtetueses: Nuk siguroi dëshmi kundër hetimit nga Vetting-u

 Zyra e Operacionit Ndërkombëtar të Monitorimit, nëpërmjet vëzhguesit përgjegjës të ONM-së, ka kërkuar nga komisioneri publik të shohë mundësinë e apelimit. Por a është kjo një e drejtë e veçantë e vëzhguesve ndërkombëtarë? Përfaqësuesit e ONM-së dhanë këtë shpjegim për bazën ligjore të kërkesës së tyre: “Vëzhguesi Ndërkombëtar mund të nxisë Komisionerin Publik për mundësinë e paraqitjes së një apelimi. Kjo e drejtë e Vëzhguesit Ndërkombëtar parashikohet në Nenin 65, paragrafi 2 i Ligjit të Vetting-ut. Tani është në dorën e Komisionerit Publik të shqyrtojë dosjen dhe të vendosin nëse do të apelojnë përpara Dhomes së Apelimit. Duhet të theksohet se sipas Nenit 63 të Ligjit të Vetting-ut, Komisioneri Publik ka pavarësinë që të apelojë një çështje pa rekomandimin e Vëzhguesve Ndërkombëtare, si rrjedhojë e faktit që Komisionerët Publikë veprojnë në interes të popullit shqiptar. Sidoqoftë, ankimimi duhet të parashtrohet brenda 15 ditëve nga data e njoftimit të vendimit me shkrim, siç parashikohet në nenin 63, paragrafi 1, të Ligjit të Vetting-ut, me shumë gjasa nga fundi i Korrikut 2018”.