Stuhia e fuqishme ”Ciaran” goditi veriperëndimin e Francës dhe jugperëndimin e Anglisë gjatë natës përpara se të lëvizte drejt Holandës, Belgjikës, Gjermanisë, Francës dhe Italisë të enjten duke lënë të paktën 10 persona të vdekur dhe disa të plagosur, thanë autoritetet.
”Ciaran” shkaktoi një vdekje në Holandë.
”Rënia e pemëve lëndoi njerëz në disa vende të tjera, duke përfshirë një grua në Hagë”, tha policia.
”Në Francë, dy persona u vranë dhe 15 u plagosën, duke përfshirë shtatë zjarrfikës”, sipas ministrit të Brendshëm, Gérald Darmanin. Një shofer kamioni ka humbur jetën pasi është përplasur me një pemë të rrëzuar.
Në Le Havre, një burrë u kap nga një erë ndërsa mbyllte grilat dhe u plagos për vdekje.
Rreth 1,2 milionë familje ishin pa energji elektrike dhe qindra mijëra u shkëputën nga rrjeti i telefonisë celulare.
Erërat arritën shpejtësi deri në 200 kilometra në orë në disa rajone.
Pemët e rëna bllokuan rrugët dhe linjat hekurudhore. Ka pasur dëme të konsiderueshme materiale.
Qindra fluturime u anuluan për shkak të stuhisë. Trenat për dhe nga Parisi gjithashtu nuk funksiononin dhe transporti u ndikua rëndë.
Erërat e fuqishme frynë gjithashtu nëpër malet Harz të Gjermanisë qendrore të enjten dhe lanë të vdekur një grua pasi u godit nga një pemë që binte, sipas brigadës lokale të zjarrfikësve në qytetin Goslar.
Gruaja 46-vjeçare nga Bavaria ishte duke ecur me bashkëshortin dhe dy fëmijët e saj në malin 600 metra të Rammelsberg pranë Goslar kur u godit.
Stuhia rrëzoi gjithashtu linjat e energjisë elektrike dhe çoi në mbylljen e pjesshme të dy autostradave në malet Harz, sipas brigadës së zjarrfikësve.
Në rajonin qendror të Italisë të Toskanës, të paktën tre persona vdiqën pasi alarmet e motit ishin vendosur në pjesën më të madhe të territorit të vendit.
Gjithashtu të enjten, ”Ciaran” goditi Britaninë e Madhe, Belgjikën dhe Holandën, me qindra fluturime të anuluara dhe përgatitje të tjera në vazhdim.
Era pritet të ulet drejt fundjavës, por me kushte të stuhishme dhe me reshje shiu.
