Kandidati i koalicionit “Bashkë fitojmë” për kryetar bashkie në Shkodër, Bardh Spahia ishte sot në familjen Zeneli në lagjen “Bahçallëk”, e cila prej vitesh ka ndërmarrë një sipërmarrje bujqësore.
“Hilmia dhe Shefqeti kanë investuar në ndërtimin e serave për prodhimin e rukolës si dhe disa prodhimeve të tjera bujqësore”, tha Spahia.
Sipas tij, “ata ia kanë dalë të vetëm, pa asnjë ndihmë nga shteti, por madje të dëmtuar disa herë prej tij në këto vite”.
“Ndërsa flasin plot pasion për punën që bëjnë, më njohën me sfidat që përballen, si konkurenca e pandershme, mungesa e subvencioneve, përmbytjet dhe dëmshpërblimet e pa marra”, theksoi Spahia.
Spahia garantoi se, në programin e tij 4-vjeçar bujqësia është një prej sektorëve që ka vëmendjen kryesore, ndërsa, shtoi ai, “tek bashkia Shkodër do të kenë gjithmonë një derë të hapur dhe mbështetje për çdo gjë që i takon pushtetit vendor”.
