Kryeministri i Spanjës, Pedro Sanchez i ka bërë thirrje Bashkimit Europian (BE) të mbrojë Bllokun në zgjedhjet për Parlamentin Europian të caktuara për më 26 maj.
Rezultati i zgjedhjeve do të nxisë ose do të dëmtojë BE-në, tha Sanchez gjatë adresimit në konferencën e mbajtur në Madrid me temë: “Mbroni Idenë e Europës”.
Sanchez në fjalimin e tij u shpreh për një Europë “më sociale” e cila si e tillë do të rikuperonte frymën dhe kohezionin europian, ku asnjë qytetar nuk do të ndihet i përjashtuar.
“Duhet ta mbrojmë Europën në mënyrë që Europa të mbrojë qytetarët e saj”, u shpreh ai.
Sanchez kishte tetë propozime politike, të cilat sipas tij, do t’i jepnin një shtytje lëvizjes europiane, siç janë modernizimi i ekonomisë, mbështetja për monedhën e përbashkët, ruajtjen e kontratës sociale, kompletimin e një “Europe feministe”, vazhdimin e luftës kundër ndryshimeve klimatike, mbështetjen për emigracionin, ndjekjen e një politike të jashtme që do të jetë e qëndrueshme dhe efektive si dhe një buxhet “ambicioz” europian.
“Gjithmonë kam besuar se Europa mbi të gjitha është një bashkësi vlerash, por edhe një bashkësi interesash që duhet të mbrohen, por kjo mund të bëhet vetëm përmes unitetit”, tha Sanchez.
Ai tha se vendi i tij do të ketë një qëndrim konstruktiv për sa i përket Brexit-it, pasi siç tha, nëse Britania e Madhe propozon një shtyrje, atëherë do të duhet të tregojë pse, për çfarë qëllimi dhe për sa kohë.
Komentet e Sanchezit u bënë në prag të takimit të jashtëzakonshëm të cilin sot do ta mbajë Këshilli Europian për të analizuar skenarët e Brexit-it.
