Presidenti gjerman Frank-Walter Steinmeier nis sot vizitën e tij zyrtare treditore në Turqi, ku pritet të takohet me liderin e opozitës dhe kryetarin e bashkisë së Stambollit Ekrem İmamoğlu, përpara se të takohet me presidentin Recep Tayyip Erdoğan të mërkurën në Ankara.
İmamoğlu, i cili sapo është konfirmuar në detyrë, shihet si shpresa e opozitës dhe një kandidat i mundshëm presidencial në të ardhmen. Steinmeier do të takohet me İmamoğlu menjëherë pas mbërritjes në Stamboll.
Gjatë vizitës së tij, Steinmeier ka planifikuar të nderojë arritjet e shtetasve turq që kanë shkuar në Gjermani që nga vitet 1960 si të ashtuquajtur punëtorë mysafirë.
Ata kanë dhënë një kontribut të rëndësishëm në rindërtimin ekonomik dhe suksesin e vendit.
Në vitin 1961, qeveritë në Bon – kryeqyteti i Gjermanisë Perëndimore në atë kohë – dhe Ankaraja nënshkruan një marrëveshje rekrutimi të fuqisë punëtore.
Sipas Ministrisë së Jashtme, rreth 876 000 njerëz shkuan në Gjermani nga Turqia në bazë të kësaj marrëveshjeje.
Sot, pothuajse 3 milionë njerëz me prejardhje turke jetojnë në Gjermani.
“Këto histori janë pjesë e identitetit të vendit tonë,” tha Steinmeier përpara vizitës së tij.
“Steinmeier gjithashtu do të vizitojë rajonin e prekur nga tërmeti në shkurt 2023, në të cilin vdiqën më shumë se 53 000 njerëz”, sipas shifrave turke.
Disa mijëra njerëz vdiqën gjithashtu në Sirinë fqinje.
Në atë kohë, qeveria gjermane premtoi një ndihmë me vlerë 238 milionë euro (254 milionë dollarë) për të lehtësuar dëmet nga tërmetet për Turqinë dhe Sirinë.
