Gjatë vizitës së ministrit izraelit të Inteligjencës, Eli Cohen të hënën në kryeqytetin Khartoum, Sudani dhe Izraeli janë dakorduar që së shpejti të hapin ambasada, tha sot për Anadolu Agency (AA) një burim i qeverisë sudaneze.
“Vizita e ministrit izraelit në Khartoum kishte për qëllim forcimin e marrëdhënieve dypalëshe midis dy vendeve në fusha të ndryshme”, tha burimi në kushte anonimiteti sepse nuk ishte i autorizuar të fliste për media.
“Cohen dhe (kryetari i Këshillit Sovran të Sudanit Abdel Fattah) Al-Burhan u dakorduan që të shkëmbejnë hapjen e ambasadave midis dy vendeve në kohën më të hershme”, tha burimi.
Të hënën, Cohen vizitoi Khartoumin për bisedime me udhëheqësit sudanezë, në vizitën e parë zyrtare publike të një ministri të qeverisë izraelite në Sudan.
Në një njoftim pas kthimit të tij në Izrael, Cohen tha se diskutuan çështje diplomatike, të sigurisë dhe ekonomike me udhëheqësit sudanezë.
“Kam besim se kjo vizitë hedh bazat në shumë aspekte të rëndësishme të bashkëpunimit që do të ndihmojnë Izraelin dhe Sudanin”, tha ai.
Gjatë vizitës, Cohen u takua me Al-Burhan, ministrin e Mbrojtjes, Yassin Ibrahim dhe zyrtarë të tjerë.
Sipas Korporatës Izraelite të Transmetimit, diskutimet përfshinin mundësinë e bashkimit të Izraelit në Këshillin e Shteteve Arabe dhe Afrikane në kufi me Detin e Kuq dhe Gjirin e Adenit.
Sipas transmetuesit, një delegacion sudanez pritet të vizitojë Izraelin së shpejti.
Nuk ka asnjë prononcim zyrtar nga Khartoumi lidhur me vizitën.
Më 23 tetor, Sudani njoftoi normalizimin kontrovers të marrëdhënieve me Izraelin, një hap i refuzuar ashpër nga disa forca politike kombëtare, përfshirë partitë e koalicionit qeverisës.
Sipas portalit izraelit të lajmeve Walla, Shtëpia e Bardhë u përpoq të organizonte një ceremoni zyrtare nënshkrimi në javët e fundit të administratës së presidentit të atëhershëm të SHBA-ve, Donald Trump me pjesëmarrjen e Al-Burhan dhe kryeministrit izraelit Benjamin Netanyahu.
Planet, megjithatë, u anuluan për shkak të kufizimeve të koronavirusit në Izrael dhe tensioneve ushtarake midis Sudanit dhe Etiopisë.
