Turqia ka hedhur poshtë një raportim të Euronews lidhur me takimin mbi Sirinë të mbajtur gjatë fundjavës midis shefit të diplomacisë të Turqisë, Rusisë dhe atij të Iranit.
Një raport i Euronews të shtunën tha se ministri i jashtëm turk, Mevlüt Çavuşoğlu, së bashku me homologun e tij rus, Sergey Lavrov, dhe atë iranian, Xhevad Zarif, dënuan operacionin e përbashkët të kryer nga SHBA-të, Britania dhe Franca në përgjigje të sulmit kimik në qytetin Duma të Sirisë, gjatë muajit të kaluar.
Raportimi po ashtu citoi ministrin Çavuşoğlu të ketë thënë se një ndërhyrje e huaj mund të pengojë procesin e paqes në Siri.
Zëdhënësi i Ministrisë së Jashtme të Turqisë, Hami Aksoy, tha se raportimi “nuk është i vërtetë dhe përbën një përpjekje të thjeshtë të manipulimit”.
“Ministri Çavuşoğlu nuk ka bërë asnjë deklaratë të tillë si kjo”, theksoi Aksoy.
