Rajoni industrial i Dnipropetrovskit, në Ukrainën Jugore, u bombardua rëndë nga ajri nga Rusia sot në mëngjes, deklaruan autoritetet ukrainase.
”Të paktën dy persona u vranë dhe 15 u plagosën në kryeqytetin rajonal të Dnipros”, njoftoi guvernatori Serhiy Lysak në Telegram.
Një ndërtesë banimi pesëkatëshe u godit dhe hekurudhat shtetërore thanë se objektet hekurudhore ishin në shënjestër.
Stacioni kryesor hekurudhor i Dnipros u mbyll dhe trenat në distanca të gjata u devijuan.
Sipas ministrit të Brendshëm Ihor Klymenko, gjashtë persona, përfshirë dy fëmijë, vdiqën gjithashtu në qytetin Synelnykove pasi u goditën disa shtëpi familjare.
Ukraina është duke u shënjestruar pothuajse çdo natë nga raketat ruse.
Rusia pushtoi Ukrainën më shumë se dy vjet më parë.
”Një fabrikë në Pavlohrad dhe një ndërtesë infrastrukture në Kryvyi Rih u dëmtuan gjithashtu”, shtuan zyrtarët.
Presidenti ukrainas, Volodymyr Zelensky shkroi në Telegram se ”qiejt mbi Ukrainë mund të mbrohen po aq mirë sa qielli mbi Izrael nëse partnerët e huaj ofrojnë më shumë armë”.
Sipas guvernatorit Lysak, sistemi i mbrojtjes ajrore mbi Dnipropetrovsk arriti të rrëzonte nëntë raketa ruse, por të tjera arritën të kalonin.
