Banorët në rrugën e kalasë në Lezhë vijojnë të kenë shqetësimin e rrëshqitjeve. Një muaj më parë, nënkryetari i bashkisë premtoi zgjidhje, por as 24 orë nga ajo deklaratë ai u arrestua për çështjen e bujshme të tjetërsimit të tokave në bregdet. Situata nuk ka ndryshuar dhe banorët apo drejtuesit e mjeteve çdo ditë jetojnë me rrezikun.
Por, një ditë më pas, ngjarjet rrodhën ndryshe në Lezhë. Nënkryetari u arrestua dhe rruga e kalasë mbeti pak jashtë vëmendjes. Por, edhe sot, 25 ditë më pas, kjo rrugë vegjeton e prishur, teksa banorët e autoveturat, pa pasur mundësi të tjera, kalojnë aty, ndonëse të frikësuar.
Preng Doku është banor i vjetër i lagjes Shehër, një lagje e vjetër e Lezhës që lidhet me këtë rrugë. Ai thotë se e ka ditur se situata mund të kishte këtë rrjedhojë, pasi metoda e ndërtimit ishte e gabuar.
“Është bërë jashtë kushteve teknike. Duhet t’i ishte dhënë mbështetje murit”, shprehet Doku.
Drejtuesit e mjeteve janë të frikësuar, por hezitojnë të flasin, ndërsa një qytetar që kishte ardhur për të vizituar kalanë thotë se nuk duhet të pritet tragjedia për të ndërhyrë: “Problemi i shqiptarëve është se presin që të ndodhin një herë tragjeditë, e pastaj marrin masa”.
Bashkia e Lezhës e ka nisur kërkesën pranë Emergjencave të Përgjithshme Civile për asistencë, pasi e ka të pamundur ndërhyrjen, por gjithçka është ndalur këtu, ndërsa rruga e kalasë mbetet në vendnumëro.
Top Channel