Myftiu i Palestinës në hutben (adresimin) në faltoren e shenjtë Mesxhid al-Aksa në Kudsin Lindor të pushtuar, gjatë namazit të xhumasë ka kritikuar vendet arabe të cilat së fundmi kanë ndërmarrë hapa për t’u afruar me Izraelin.
Hutbeja e xhumasë u lexua nga Myftiu i Kudsit dhe Palestinës, Shejh Muhamed Husejin, i cili tërhoqi vëmendjen se shtetet arabe kanë filluar të afrohen me Izraelin.
“Teksa faltorja jonë gjendet nën okupim dhe ndotet nga çizmet e okupatorëve, si mund të afroheni me ta?”, tha Husejin.
Myftiu palestinez tha se Mesxhid al-Aksa u përket muslimanëve dhe si e tillë nuk do të ndahet, ndërsa u bëri thirrje palestinezëve të mos bien pre e provokimeve të Izraelit.
Husejin po ashtu dënoi sulmin terrorist ndaj dy xhamive në Zelandë të Re që la të vdekur 49 persona, ndërkohë që besimtarët falën namazin e xhenazes në mungesë për viktimat dhe bënë lutje.
Siç njoftoi Autoriteti i Vakëfeve Islame të Kudsit, organ nën kompetenca të Jordanisë që kujdeset për Mesxhid al-Aksanë, sot në namazin e xhumasë të pranishëm ishin mbi 40 mijë besimtarë.
