Se Qeveria e Shteteve të Bashkuara të Amerikës (SHBA) ka nisur sanksionet ndaj Kosovës për shkak të mos respektimit të kërkesave nga ana e Kryeministrit Ramush Haradinaj, tani më është më se e qartë, pasi i pari i Qeverisë po refuzon ta pezullojë taksën 100%.
KosovaPost raportoi e para se marrëdhëniet ndërshtetërore Kosovë-SHBA janë tronditur pas vendosjes së taksës ndaj prodhimeve të Serbisë dhe Bosnjë e Hercegovinës. Gjenerali amerikan i Gardës Nacionale të Iowas, Timothy Orr ka anuluar vizitën në Kosovë për nderë të pavarësisë, tani më është vërtetuar edhe me anë të një dokumenti.
Në letrën e komandantit Rama, thuhet se zyrtarë amerikanë nga Washingtoni janë duke shqyrtuar edhe masa të tjera, përfshirë këtu pezullimin e programeve trajnuese dhe edukative, vizitat ushtarake në Kosovë.
Lajmin për anulimin e vizitës së gjeneralit për shkak të taksës sot e ka konfirmuar edhe Ambasada e Shteteve të Bashkuara në Prishtinë.
Vizita e gjeneralit amerikan ishte paraparë të realizohet nga data 16 deri më 18 shkurt, për të shënuar 11 vjetorin e pavarësisë së Kosovës.
Ambasada e Shteteve të Bashkuara ka thënë javë më parë përmes një deklarate se veprimet që minojnë dialogun, përbëjnë qëndrim kundër interesave të SHBA-së.
