residenti i Iranit, Hassan Rouhani, ka deklaruar se Mbretëria e Bashkuar do të përballet me “pasoja” për konfiskimin e një tankeri iranian të naftës në Gjibraltar.
“Unë paralajmëroj Britaninë se ju jeni iniciator i pasigurisë në dete dhe më vonë do të kuptoni pasojat e saj”, tha Rouhani në deklaratat e cituara nga mediat lokale.
Qeveria britanike tha se tankeri i naftës besohet të ketë mbajtur dy milionë fuçi naftë bruto në Siri, duke shkelur sanksionet e Bashkimit Evropian (BE) kundër regjimit të presidentit sirian, Bashar al-Assad.
“Armiku po kërkon të krijojë pasiguri në rajon, kështu që ka shkelur në hapësirën ajrore të Iranit dhe sigurisht është përballur me një përgjigje të fuqishme dhe nga ana tjetër ata kanë konfiskuar një tanker iranian me një autorizim, që është një veprim shumë i gabuar”, tha Rouhani.
“Forcat britanike e konfiskuan këtë anije padrejtësisht në Gjibraltar”, shtoi ai.
Irani ka denoncuar konfiskimin e anijes si “pirateri” dhe ka thirrur të dërguarin britanik në Teheran për të protestuar ndaj veprimit, duke mohuar pretendimet se tankeri ishte i lidhur me Sirinë.
Dje, Teherani u zotua për t’iu përgjigjur konfiskimit të tankerit të naftës “në një kohë dhe vend të përshtatshëm”.
