Ambasadorja në detyrë e SHBA-ve në Ukrainë do të largohet nga posti i saj, në më pak se një vit në detyrë, ka bërë të ditur Departamenti i Shtetit. Largimi i saj vjen në një kohë kur përpjekjet e ndërmjetësuara nga SHBA-të për të arritur një armëpushim dhe për t’i dhënë fund pushtimit rus janë zbehur.
Julie Davis ishte zhgënjyer nga presidenti Donald Trump për mungesën e mbështetjes ndaj Ukrainës, raportoi Financial Times, duke cituar burime anonime. Departamenti i Shtetit mohoi që të ketë pasur mosmarrëveshje të tilla dhe tha se ajo po tërhiqet nga detyra.
Trump ka ushtruar presion mbi Kievin për të arritur një marrëveshje paqeje me Rusinë, duke thënë se vendi mund të lëshojë territor për të siguruar një marrëveshje.
Deri tani, presidenti nuk ka arritur t’i japë fund luftës përmes bisedimeve për armëpushim, të cilat tashmë janë në masë të madhe të bllokuara, ndërsa Uashingtoni ka përqendruar vëmendjen te lufta me Iranin. “Është e pavërtetë të sugjerohet se ambasadorja Davis po jep dorëheqjen ‘për shkak të mosmarrëveshjeve me Donald Trump’”, tha zëdhënësi i Departamentit të Shtetit, Tommy Pigott. “Ajo do të vazhdojë të zbatojë me krenari politikat e presidentit Trump derisa të largohet zyrtarisht nga Kievi në qershor 2026 dhe të dalë në pension nga departamenti”,shtoi ai.
Davis, zyrtarja më e lartë e ambasadës amerikane, mban postin e të ngarkuarës me punë (charge d’affaires), por nuk është ambasadore e konfirmuar nga Senati. Ajo ka shërbyer gjithashtu si ambasadore e SHBA-ve në Qipro që nga viti 2023, duke mbajtur një rol të dyfishtë gjatë kohës së saj në Kiev.
Ajo u emërua nga administrata Trump në maj të vitit të kaluar pasi paraardhësja e saj, diplomate e karrierës Bridget Brink, dha dorëheqjen.
Brink, e cila ishte emëruar nga presidenti i atëhershëm Joe Biden dhe tani kandidon si demokrate për Kongresin, tha se ishte alarmuar nga “qetësimi” i Rusisë nga Trump dhe mënyra se si ai “ushtroi presion mbi viktimën, Ukrainën.”
Që nga marrja e detyrës në janar 2025, Trump i ka atribuar vazhdimisht faj Ukrainës për pushtimin e vendit nga Rusia më shumë se katër vite më parë dhe ka pasur një marrëdhënie të trazuar me presidentin ukrainas Volodymyr Zelenskyy.
