Presidenti i Turqisë, Recep Tayyip Erdogan mes datave 13-15 maj do të vizitojë Mbretërinë e Bashkuar ku do të takohet me Mbretëreshën Elizabeta II dhe kryeministren Theresa May.
Në një deklaratë nga Qendra për media e Presidencës së Turqisë thuhet se Erdogan do qëndrojë në Britani të Madhe, shtet aleat dhe partner strategjik i Turqisë me të cilin vazhdon zhvillimi i marrëdhënieve dypalëshe dhe bashkëpunimit në çdo fushë.
Erdogan me këtë rast do të takohet me Mbretëreshën Elizabeta II dhe kryeministren Theresa May.
Në kuadër të vizitës së tij presidenti Erdogan do të marrë pjesë në aktivitetin përmbyllës të takimit të shtatë të Forumit Turko-Britanik “Tatlidil” i cili ka për qëllim pasurimin e marrëdhënieve dypalëshe, përfshirë edhe dialogun civil. Ai poashtu do të takohet me bashkësinë e biznesit dhe me investitorë të njohur të shtetit.
Në takimet e tij në Londër, Erdogan pritet të diskutojë për zhvillimin e bashkëpunimit dypalësh në fushat prioritare si në ekonomi, tregti, siguri, industri të mbrojtjes, e kulturë si dhe për zhvillimet rajonale duke filluar nga ato në Siri dhe Irak, Planin e Përbashkët të Veprimit Gjithëpërfshirës, për Qipron, marrëdhëniet me Bashkimin Europian si dhe për luftën kundër terrorizmit.
Mbretëria e Bashkuar, shtet me të cilin Turqia është në dialog intensiv në çdo nivel në luftën kundër terrorizmit dhe përballë sfidave rajonale dhe globale, me një vëllim të tregtisë dypalëshe në vlerë prej më shumë se 16 miliardë dollarë është në mesin e partnerëve kryesorë ekonomik të Turqisë./Rtv Islam/
