Forcat armene sot vazhduan shënjestrimin e vendbanimeve civile dhe njësive të ushtrisë së Azerbajxhanit në drejtime të ndryshme të frontit me mortaja, obusë dhe armë të vogla, tha Ministria e Mbrojtjes e Azerbajxhanit.
Duke filluar herët në mëngjes, forcat e armatosura armene kanë sulmuar qytetin Tartar, si dhe fshatrat Gazyan dhe Husanli të këtij rajoni, theksohet në deklaratën e ministrisë.
Fshati Tapgaragoyunlu në rajonin Goranboy u sulmua gjithashtu nga forcat armene natën e kaluar, thuhet më tej.
“Njësitë e Ushtrisë së Azerbajxhanit po marrin masa hakmarrëse për të shtypur pikat e zjarrit të armikut”, theksohet në deklaratë.
Gjatë natës, pozicionet e njësive ushtarake të Azerbajxhanit të vendosura në rajonet Tovuz, Gadabay dhe Dashkesan të Azerbajxhanit u qëlluan gjithashtu “me ndërprerje” nga drejtimi i rajoneve Berd, Chambarak dhe Vardenis të Armenisë, shtohet më tej.
Duke theksuar se këto rajone janë gjeografikisht larg “frontit të operacioneve luftarake”, Hikmet Hajiyev, ndihmësi i presidentit azerbajxhanas, në Twitter tha se Armenia përpiqet të “zgjerojë gjeografinë e operacioneve ushtarake” me provokime të tilla.
Ministria tha se operacionet luftarake vazhduan me intensitet të ndryshëm, kryesisht në drejtimet Aghdere, Aghdam, Khojavend dhe Gubadli të frontit.
“Armiku u detyrua të tërhiqet duke pësuar viktima në personel dhe automjete ushtarake në disa zona të frontit”, tha ai.
Duke vënë në dukje se operacionet luftarake janë aktualisht në zhvillim, ministria tha se situata operacionale është “nën kontrollin” e trupave azerbajxhanase.
Që kur shpërthyen përplasjet më 27 shator, Armenia vazhdimisht ka sulmuar civilët dhe forcat e Azerbajxhanit, duke shkelur armëpushimet humanitare.
Marrëdhëniet midis dy ish-republikave sovjetike kanë qenë të tensionuara që nga viti 1991 kur ushtria armene pushtoi Malësinë e Karabakut, një territor ndërkombëtarisht i njohur i Azerbajxhanit.
