Deputeti demokrat, Belind Këlliçi ka komentuar sot aksionin e SPAK për arrestimin e disa zyrtarëve dhe personave të implikuar për çështjen e inceneratorit të Elbasanit dhe të Fierit.
Në një deklaratë nga selia blu, Këlliçi tha se pas hekurave janë shërbëtorët e pushtetit dhe jo ata që kanë dhënë urdhrat. Sipas tij pas hekurave duhet të ishin kryeministri Rama, kryebashkiaku Veliaj, ministri Ahmetaj apo dhe këshilltari, Engjëll Agaçi.
“Doja të gjej rastin për të falënderuar që është bërë transparence nga institucionet për këtë aferë, apo dhe partitë e tjera opozitare, me apo dhe shqiptarët që kanë ngritur zërin. Sot SPAK ka lëshuar disa urdhër-arreste, por i kanë lëshuar për shërbëtorët e pushtetit, por jo ata që kanë urdhëruar. Ne kemi dhënë dhe faktuar me prova dhe fakte, se skema nis me Edi Ramën, Veliajn, Ahmetajn, Engjëll Agaçin. Kreu i gjithë kësaj vjedhje është inceneratori i Tiranës, është skemë mafioze, ku përgjegjësi është Erjon Veliaj. I cili i hapi rrugë koncensionarit 24 orë para.
Afera e inceneratorit na ka mësuar me fakte tronditëse, dhe ka thyer rekord botëror, pasi 17 procedurat janë bërë brenda një dite. Se si i është hedhur hi shqiptarëve me media të paguara. Se si pronarët e inceneratorëve merrnin para nga shteti dhe paguanin veten për të këshilluar vetëveten. Unë uroj që drejtësi anë këtë rast, me këtë dosje të bëhej një herë të vetme drejtësi në Shqipëri. Sot është momenti për të ngritur zërin dhe për të kërkuar se Edi Rama, Veliaj, të mbajnë përgjegjësi. Kam votuar kundër për draftraportit, pasi nuk më është dhënë mundësia për ta parë. Por do të jepja ndihmë shtesë për raportin final për të rënduar pozitën.”, tha ai.
