Në prag të ndërrimit të viteve Drejtuesi Politik i Partisë Socialiste për Qarkun e Fierit, Taulant Balla i shoqëruar nga kryebashkiaku Armando Subashi ishin në një prej qendrave të kujdesit për të moshuar të vetmuar ose të braktisur nga familjarët e tyre në qytetin e Fierit.
Në fjalën e tij Balla tha se ky është vendi i duhur për të qenë përpara se të mblidhemi në familjet tona për festën e Vitit të Ri.
“Vlerësoj angazhimin për të mos lënë asnjë vetëm, si një parim të punës sonë.
Të gjithë mblidhemi me njerëzit e dashur në natën e ndërrimit të viteve dhe dua t’ju them që ju jeni njerëzit e dashur të këtij qyteti.
Shpresoj që 2022 të jetë viti i fitores përfundimtare me armikun e padukshëm, pandeminë Covid-19.
Në 2022 kemi një angazhim më të madh dhe në buxhetin e Bashkisë Fier për vitin e ardhshëm ka më shumë investime për qendrat rezidenciale.
Solidariteti është një vlerë që i përket familjes sonë të madhe politike.
Në vlerësojmë punën e punonjësve social që kujdesen përditë për ju”, deklaroi Balla.