Komisioni Evropian do të prezantojë sot masa të reja për të nxitur industrinë evropiane të energjisë së erës për të arritur objektivat e Bashkimit Evropian për prodhimin e energjisë së rinovueshme deri në vitin 2030.
Procedurat e gjata të miratimit, rritja e kostove të lëndëve të para, turbinat më të lira nga jashtë dhe inflacioni i lartë kanë penguar zgjerimin e kapacitetit të energjisë së erës në BE.
“Ndërsa prodhimi i energjisë së erës u rrit me 10% në nivel global në gjashtë muajt e parë të vitit në krahasim me të njëjtën periudhë të vitit të kaluar, rritja e energjisë në BE ishte vetëm 5%”, sipas një raporti nga grupi i ekspertëve “Ember”.
Komisioni synon të rikthejë këtë tendencë dhe të arrijë objektivin e tij klimatik për të gjeneruar 42,5% të konsumit total të energjisë në BE nga burimet e rinovueshme deri në vitin 2030.
“Për të përshpejtuar procesin e miratimit, komisioni planifikon një mjet online, duke përfshirë përgjigjet e pyetjeve të bëra shpesh, për të mbështetur shtetet anëtare në autorizimin e parqeve të reja me erë”, sipas një drafti.
Kriteret për procedurat e tenderit duhet të përditësohen për të marrë parasysh faktorë shtesë përveç kostove, si qëndrueshmëria dhe siguria kibernetike.
