Presidenti i Republikës, Bajram Begaj, ndodhet sot në Mal të Zi, ku do të marrë pjesë në ceremoninë e inaugurimit të Presidentit të ri të Malit të Zi, Jakov Milatovic.
Në rrugën drejt Podgoricës, Begaj u ndal për një kafe në qytetin e Tuzit.
Begaj publikoi në rrjetet sociale foto të këtij takimi. ”Një kafe mes vëllezërish në Tuz”, shkroi ai.
Presidenti Begaj do të jetë në Podgoricë, për të marrë pjesë në ceremonitë e parashikuara me rastin e inaugurimit të Presidentit të ri të Malit të Zi, Jakov Milatovic.
Zyra e shtypit e Presidentit bën të ditur se, prezenca e Presidentit Begaj në këto ceremoni është tregues i vullnetit për forcimin e mëtejshëm të fqinjësisë së mirë si dhe vlerësim për rolin e faktorit shqiptar në stabilitetin dhe rrugëtimin euroatlantik të Malit të Zi.
Në këto ceremoni pritet të marrin pjesë një sërë krerë shtetesh dhe qeverish nga vendet e rajonit të Evropës Juglindore, si dhe shumë zyrtarë të lartë evropianë dhe amerikanë.
