Kritikave për marrëveshjen e arritur një ditë më parë mes PS dhe PD për komisionet hetimore, Kryeministri Edi Rama u ka kthyer përgjigje përmes një postimi në rrjetet sociale, duke sqaruar se socialistët nuk janë tërhequr nga qëndrimi i tyre i kahershëm.
Kryeministri thotë se dakordësia e arritur me Partinë Demokratike për dy komisione hetimore nuk është pazar, siç është komentuar, por PS nuk pengon asnjë komision hetimor që do të ngrihet brenda kornizës kushtetuese.
“Të gjithë idiotët e dobishëm janë sulur socialeve e kanaleve për të thënë se paskërkemi gëlltitur ç’kemi thënë dhe po bashkëpunokemi me Non Gratën, pse jemi dakord që sipas kornizës së përcaktuar nga Gjykata Kushtetuese të miratojmë komisione hetimore brenda kësaj kornize! Po ne këtë e kemi thënë e stërthënë dhjetra herë, qyshse refuzuam të miratojmë kërkesa për të ngritur komisione hetimore jashtë asaj kornize! Dhe nëse deputetë të Kuvendit që mbledhin firmat për të ngritur një komision hetimor e bëjnë kërkesën brenda asaj kornize, ne s’kemi as të drejtë, as arsye e as mundësi që ta refuzojmë. E kurdoherë që kjo të ndodhë vota jonë është sigurisht pro! Çfarë ka këtu për të vënë kujën përveç nevojës për të helmuar publikun me akuza dhe shpifje krejt të pabaza mbi medemek “pazarin me Non Gratën”, i cili thjesht nuk ekziston”.
Sa i përket Komisionit bipartizan të Reformës Zgjedhore, Kryeministri Rama thotë se nëse nuk arrihet dakordësi mes palëve për ndryshimet ligjore, edhe në zgjedhjet e ardhshme parlamentare nuk do të ketë ndryshim në Kodin Elektoral për të reflektuar rekomandimet.
“Edhe për Komisionin bipartizan të Reformës Zgjedhore e kemi thënë prej disa kohësh, nëse nuk pjell asgjë veç sherrit e shamatasë së tyre deri kur të mbyllet afati, do të mbyllet edhe komisioni e kjo punë do t’i mbetet Kuvendit, ku po nuk u arrit dot ndonjë mirëkuptim për ndryshime të ligjit dhe s’ka numra në sallë për të votuar ndryshime, do të shkojmë në zgjedhje me ligjin që kemi. As për këtë s’kemi ndryshuar ndonjë qëndrim a mendim. Atëherë ku është ky pazar dhe ku hyn Non Grata në këtë mes”.
Rikthimin në normalitet të opozitës sa i përket jetës parlamentare, Kryeministri Edi Rama e konsideron çështje të brendshme të tyre, ndërsa thekson se sa i përket Partisë Socialiste mbetet në të njëjtin qëndrim.
“Ah, nëse ata që do të digjnin parlamentin kanë ndërruar mendje dhe duan të rikthehen në punë, ne as nuk i pengojmë dot, as nuk duam t’i pengojmë të reflektojnë, përkundrazi na vjen mirë që ta bëjnë. Kjo është e gjitha dhe ne jemi ata që ishim, aty ku ishim, me po ato qëndrime që kishim, jo sepse është gabim të ndryshosh qëndrim, po sepse në këtë nuk ka asgjë për të ndryshuar në qëndrimin tonë. Çudi që s’e mësuan dot që Partia Socialiste është gjithnjë tre hapa përpara dhe në fund të gjitha xhirot bosh përfundojnë po në pikën ku nisin, tre hapa mbrapa nesh”.
Të martën, PS dhe PD u dakordësuan në parim për ngritjen e dy komisioneve hetimore që kërkohen nga opozita, çka do të bëjë që Partia Demokratike t’i japë fund kaosit në Parlament dhe komisione parlamentare.
Të gjithë idiotët e dobishëm janë sulur socialeve e kanaleve për të thënë se paskërkemi gëlltitur ç’kemi thënë dhe po bashkëpunokemi me Non Gratën, pse jemi dakord që sipas kornizës së përcaktuar nga Gjykata Kushtetuese të miratojmë komisione hetimore brenda kësaj kornize!
Po…
— Edi Rama (@ediramaal) March 13, 2024
