Rrjeti social Facebook do të investojë tre milionë dollarë në një program të destinuar për të ndihmuar disa gazeta lokale amerikane që të rrisin numrin e abonentëve në internet, një çështje e rëndësishme për këto të përditshme.
Projekti, i quajtur “Local News Subscriptions Accelerator”, ka identifikuar tashmë 13 gazeta, sipas një mesazhi të postuar sot nga drejtori i Facebook-ut për partneritetin mediatik, Campbell Brown.
“Me ndihmën e Tim Griggs, specialist i medias digjitale, rrjeti social do të ofrojë një trajnim për përfaqësuesit e këtyre të përditshmeve për rritur nivelin e aktivitetit të abonimeve në internet”, sipas Campbell Brown.
Pas fazës së parë të përbashkët me të gjitha gazetat partnere, mes të cilave bëjnë pjesë “Chicago Tribune”, “San Francisco Chronicle” apo “Miami Herald”, çdo e përditshme do të krijojë planin e saj strategjik me ndihmën e specialistëve.
Shuma prej tre milionë dollarësh do të shërbejë veçanërisht për zbatimin e këtyre planeve strategjike.
Në mbështetje të fushatës zgjedhore dhe vitit të parë të Donald Trump-it në Shtëpinë e Bardhë, tri prej katër të përditshmeve të mëdha amerikane me audiencë kombëtare, “New York Times”, “Washington Post” dhe “Wall Street Journal”, kanë parë një rritje të numrit të tyre të të abonuarve.
