Nëntë muaj para zgjedhjeve presidenciale në Francë, skena politike vijon të dominohet nga një pyetje kyçe: kush mund ta ndalë Marine Le Pen?
Sipas sondazheve të fundit, asnjë nga kandidatët kryesorë të përfolur nuk duket se është në gjendje ta mposhtë lideren e së djathtës ekstreme në një balotazh.
Një anketim i institutit Ifop tregon se Le Pen do të fitonte raundin e dytë të zgjedhjeve kundër ish-kryeministrit Édouard Philippe, ish-kryeministrit Gabriel Attal dhe liderit të së majtës Jean-Luc Mélenchon, me mbështetje që varion nga 54% deri në 70%, në varësi të kundërshtarit.
Sondazhi u zhvillua menjëherë pasi Le Pen njoftoi rikthimin e saj në garën presidenciale, pas zhvillimeve të fundit në procesin gjyqësor që i kanë lejuar të vijojë kandidaturën ndërsa pret vendimin përfundimtar të Gjykatës së Kasacionit.
Drejtori i përgjithshëm i Ifop, Frédéric Dabi, e cilëson këtë një ndryshim “historik” në elektoratin francez, duke theksuar se për herë të parë Rassemblement National arrin të kryesojë edhe mes pensionistëve, një grup që tradicionalisht ka qenë një nga pengesat kryesore për ardhjen e së djathtës ekstreme në pushtet.
Megjithatë, analistët këshillojnë kujdes në interpretimin e këtyre rezultateve. Brice Teinturier, drejtues i institutit Ipsos BVA, vlerëson se është ende herët për të bërë parashikime të sigurta, pasi lista përfundimtare e kandidatëve nuk është përcaktuar dhe gara presidenciale mbetet më e hapur se në zgjedhjet e mëparshme. Sipas tij, megjithëse një fitore e Le Pen nuk është e sigurt, ajo tashmë konsiderohet një skenar real.
Në kampin e majtë, Jean-Luc Mélenchon mbetet kandidati me organizimin më të fortë dhe bazën më të konsoliduar elektorale, por sondazhet tregojnë se ai do të humbiste me diferencën më të madhe përballë Le Pen.
Kjo ka shtyrë socialistët të shqyrtojnë alternativa të tjera, ndërsa eurodeputeti Raphaël Glucksmann po përgatitet të hyjë në garë.
Në të njëjtën kohë, ish-presidenti François Hollande ka shënuar rritje të ndjeshme të popullaritetit mes votuesve progresistë, sipas matjeve të fundit të opinionit.
Edhe qendra politike përballet me sfidën e fragmentimit. Édouard Philippe dhe Gabriel Attal vijojnë fushatat e tyre veçmas, ndërsa mungesa e një kandidature të përbashkët mund të çojë në shpërndarjen e votave dhe ta bëjë edhe më të vështirë ndërtimin e një fronti të aftë për të sfiduar Le Pen në raundin e dytë.
Edhe pse në opinionin publik janë përmendur emra të tjerë si biznesmeni Michel-Édouard Leclerc apo bankieri Matthieu Pigasse, ekspertët i konsiderojnë këto skenarë pak të mundshëm, duke argumentuar se sistemi zgjedhor francez kërkon mbështetje të gjerë politike, 500 firma nga zyrtarë të zgjedhur dhe një strukturë të konsoliduar kombëtare, çka e bën shumë të vështirë daljen e një kandidati të ri në prag të zgjedhjeve.
Me sondazhet që e vendosin Marine Le Pen në avantazh dhe me kampet rivale ende të përçara, gara për Pallatin Élysée po shfaqet si një nga më të paparashikueshmet në historinë e fundit të Francës, ndërsa rezultati i saj pritet të ketë ndikim jo vetëm për politikën franceze, por edhe për të ardhmen e Bashkimit Evropian.
