Gabova… më fal!
Gabimi është diçka e pashmangshme, sepse askush nuk është i pagabueshëm, sikur ka thënë dhe Profeti, salallahu alejhi ue selem:“Çdo bir i Ademit është gabimtar, por gabimtari më i mirë është ai që pendohet”. Tirmidhiu dhe Nesai.
Por, problemi qëndron atëherë kur njëri prej bashkëshortëve e kupton që ka gabuar dhe këmbëngul në gabimin e tij, me pretekstin se po të kërkoj falje kjo do t’i ulë reputacionin. Në fakt ky është një gabim i madh të cilin e zbukuron shejtani.
Padyshim nëse dikush prej bashkëshortëve bie në gabim dhe i kërkon falje palës tjetër, jam i bindur se gjendja e tij/saj do të jetë më e mirë se para kërkimit të faljes.
Madje, shpeshherë disa gabime janë bërë shkak për rregullimin e marrëdhënieve, sa që kanë thënë se lidhja e cila fillon pas një problemi është më e fortë se çdo lidhje.
