Shërbimi sekret i Gjermanisë Lindore përgjoi nga afër kancelarin gjerman Olaf Scholz kur ai ishte një anëtar i lartë i forumit rinor të Partisë Social Demokrate të Gjermanisë Perëndimore në vitet 1970 dhe ’80.
Dosjet e siguruara nga gazeta “BILD” tregojnë se Stasi ndiqte nga afër vizitën e tij në vendin komunist në një kohë kur ai ishte nënkryetar i Socialistëve të Rinj, duke e përshkruar atë si një “profesionist politik me përvojë që ka shumë ndikim në organizatë”.
Stasi mblodhi një sasi të madhe informacioni për qytetarët e Gjermanisë Lindore dhe njerëzit me ndikim jashtë vendit, si nëpërmjet agjentëve të tij ashtu edhe me ndihmën e informatorëve.
Shumë prej dosjeve u shkatërruan para ribashkimit gjerman në vitin 1990, por disa prej tyre kanë mbijetuar dhe mund të shikohen nga personat e interesuar, por edhe për qëllime kërkimore.
I pyetur në lidhje me dosjet të enjten, Scholz tha se ato “nuk janë diçka e këndshme, por kështu ka ndodhur”.
63-vjeçari u zgjodh kancelar muajin e kaluar, duke pasuar në këtë post Angela Merkel, e cila u rrit në Gjermaninë Lindore.
