Kryetari i Partisë Demokratike Lulzim Basha, në një deklaratë për mediet, pasi la sallën e Kuvendit, reagoi ndaj mosmbajtjes së interpelancës së thirrur me Kryeministrin Edi Rama për deklaratat e ish-zv.kryeministrit Ahmetaj në një intervistë ndërsa është i shpallur në kërkim nga SPAK.
Basha tha se Rama përdori vizitën e Sekretarit Amerikan të Shtetit, Anthony Blinken që t’i fshihet Kushtetutës.
“Është e qartë që Edi Rama ka përdorur vizitën e sekretarit Blinken për t’u fshehur nga një detyrim kushtetues, që nga ana tjetër tregon se çfarë teatri i shpifur luhet këtu dhe sa i leverdis Ramës që të mos ketë Parlament, të mos ketë përgjegjësinë që të përgjigjet para shqiptarëve, detyrimin të përgjigjet para opozitës, para PD. Dhe nga ana tjetër po kështu shpreh keqardhjen që ky skenar, që është totalisht në favor të Edi Ramës, sot ekzekutohet nga të tjerë deputetë të opozitës duke i hequr mundësinë opozitë ta gozhdojë Ramën para opinionit publik”, tha Basha.
Megjithatë vijoi ai, siç e kam thënë, siç e kam komunikuar edhe me qytetarët gjatë konferencave tona për shtyp, PD nuk do të dorëzohet para këtij realiteti, para këtij teatri të qartë që luajnë me njëri-tjetrin.
“Ndonëse i ikën interpelancës, përgjegjësisë nuk do t’i ikin dot. PD po përgatit dhe javën e ardhshme do të dorëzojë në SPAK padi penale bazuar mbi faktet e reja të dala në dritë, përfshirë pohimet e ish-zv.kryeministrit që përfituesi i vërtetë i aferës së inceneratorëve është Rama, si edhe subjekte të tjera të përfshirë në këtë aferë, të denoncuara nga ish-zv.kryeministri, që është individi Blerim Hoxha, i cili supozohet është një nga prestanomet që ka kanalizuar miliona euro të shqiptarëve, të vjedhura përmes inceneratorëve, në xhepat dhe në fushatat elektorale të PS, të Edi Ramës dhe Erion Veliajt”, deklaroi Basha, për mediet.
