Ushtria izraelite tha se ka vrarë liderin e Hezbollahut, Sayyed Hassan Nasrallah, në një seri sulmesh në një periferi në jug të Bejrutit, sipas “The Guardian”.
Forcat e Mbrojtjes të Izraelit (IDF) thanë se kishin shënjestruar selinë nëntokësore të Hezbollahut.
Njoftimi i IDF-së sot në mëngjes erdhi pas spekulimeve gjatë natës për fatin e Nasrallah, liderit të Hezbollahut – për tre dekada.
Sipas burimeve në Izrael, kabineti izraelit i sigurisë ishte tërhequr më herët nga planet për të vrarë Nasrallah, por pasi kishte vërtetuar se lideri i Hezbollahut do të merrte pjesë në një takim në kompleksin komandues, miratoi një plan për ta vrarë atë.
Raportet në mediet izraelite thanë se vrasja e Nasrallah ishte kryer nga një skuadrilje avionësh izraelitë F15I të pajisur me bomba që shkatërronin bunkerët.
Lajmi u dha fillimisht nga zëdhënësi ushtarak, nënkoloneli Nadav Shoshani në një postim të shkurtër në X duke thënë: “Hassan Nasrallah ka vdekur”.
Në një deklaratë të lëshuar menjëherë më pas, IDF tha se Nasrallah ishte vrarë së bashku me komandantin e frontit jugor të Hezbollahut, Ali Karki, si dhe komandantët e tjerë të Hezbollahut që po merrnin pjesë në takim.
“Pas inteligjencës së saktë nga IDF-ja dhe struktura izraelite e sigurisë, avionët luftarakë IAF kryen një sulm në shënjestër mbi shtabin qendror të organizatës terroriste Hezbollah, e cila ndodhej nën tokë, e vendosur nën një ndërtesë banimi në zonën Dahieh të Bejrutit”, thuhet në deklaratë.
Sulmi u krye ndërsa zinxhiri i lartë komandues i Hezbollahut po vepronte nga selia dhe po avanconte aktivitetet terroriste kundër qytetarëve të shtetit të Izraelit.
Pas pretendimit se kishte vrarë Nasrallah, ushtria izraelite tha se ishte në gadishmëri të lartë dhe e përgatitur për një përshkallëzim më të gjerë.
Hezbollahu nuk ka bërë ende një deklaratë mbi pretendimin e Izraelit se ka vrarë liderin e tij.
