Expo Albania është qendra multifunksionale e Tiranës moderne të së ardhmes, projekti për të cilën mbërriti sot në fazën finale të konkurrimit, ku 5 skuadra prestigjoze në botën e arkitekturës bashkëkohore, të përzgjedhura mes afro 60 konkurentësh nga e gjithë bota, do të prezantojnë koncept idetë e tyre.
Qendra pritet t’i ofrojë Tiranës një infrastrukturë moderne ekspozimi, deri më sot e munguar, duke i dhënë mundësinë kryeqytetit tonë të jetë një lider në rajon edhe në aspektin e evenimenteve ndërkombëtare të industrisë, organizimit të panaireve, ekspozitave të artit, kulturës, historisë, konferencave e takimeve të shumëllojshme, duke krijuar kështu një ofertë të re për Shqipërinë e vitit 2030.
Në një garë dinjitoze projektesh, do të konkurrojnë në fazën finale dy studio të famshme të arkitektëve amerikanë Steven Hall dhe Jeanne Gang, studio gjermane Kuehn Malvezzi, skuadra belge e Office KGDV dhe studio e mirënjohur italiane edhe në Shqipëri e Stefano Boerit.
Në nisje të konkurrimit, Kryeministri Rama përshëndeti të pranishmit, teksa theksoi se në rrugën e transformimit të vendit, kontributi i arkitektëve është i jashtëzakonshëm.
Rama tha se “ky projekt është i rëndësishëm në rrugën e transformimit të vendit dhe në një fazë të re zhvillimi ku ka hyrë vendi ynë, që lidhet ndër të tjera edhe me kontributin e arkitekturës në këtë transformim dhe me praninë e një rrethi të gjerë arkitektësh me prestigj ndërkombëtar, të cilët shtohen dita ditës në funksion të jetësimit të një ardhmeje që arkitektura ndihmon ta shohim më pranë dhe ta parashohim përmes shprehjeve dhe shfaqjeve të saj”.
“Ky është një tjetër projekt ambicioz, që sjell një tjetër kontribut në një nivel tjetër zhvillimin ku arkitektura ka një rol për të luajtur dhe ku ne kemi bindjen se kontributi i arkitektëve është i jashtëzakonshëm. Gjithkush mund ta parashikojë të ardhmen në mënyrën e tij dhe përmes formave dhe shfaqjeve të ndryshme të arkitekturës”, theksoi Rama.
Kryeministri Rama u shpreh se “kjo finale e konkursit ka për qëllim përzgjedhjen e projektit më të mirë sepse jam i bindur që të gjitha projektet e këtyre studiove janë shumë të mira por projektet që juria do të shikojë si më të përshtatshëm për t’u ndërtuar, për t’i dhënë Shqipërisë një qendër të re që e kemi quajtur “Expo Albania”, ku do të kemi infrastrukturë për organizime të posaçme që nga panairet tregtare, tek ekspozitat e artit, eventet, konferencat, takimet e përmasave të ndryshme. Patjetër edhe një destinacion për banorët e Tiranës, por edhe vizitorët e turistët gjithnjë e më të shumtë, të cilët do të gjejnë arsye për të vizituar këtë hapësirë të re që po ndërtojmë”.
“Ky është një moment shumë i mirëseardhur për të ngritur këtë qendër ekspozimi ku mund të ndodhin ato organizime që mund te zhvillohen në këtë lloj hapësire. Vjen në momentin e duhur se disa vite më parë do të ishte shumë e parakohshme të investoje masivisht në këtë lloj infrastrukture, por tani kjo është një nga shumë gjërat që Shqipëria ka nevojë në mënyrë që të ecë përpara dhe të rrisë stekën e ambicies së saj”, nënvizoi Rama.
Duke falënderuar anëtarët e jurisë së këtij konkursi, Rama tha se “falënderoj kryetaren e jurisë Bendetta Tagliabue, një emër i mirënjohur në botën e arkitekturës dhe një tjetër anëtare e grupit në rritje të arkitektëve që kanë dëshirën dhe janë të përfshirë në këtë aventurë të madhe të shfrytëzimit të potencialit të arkitekturës për të transformuar një vend të tërë”.
“Expo Albania” do të jetë një destinacion për organizimin e panaireve, ekspozitave të artit, kulturës, historisë, konferencave e takimeve të shumëllojshme.
