Kryeministri bullgar, Nikolai Denkov dha dorëheqjen, ashtu siç pritej, pas nëntë muajsh në krye të një qeverie pro perëndimore duke hapur derën për partnerin e tij të koalicionit për të udhëhequr vendin.
Letra e dorëheqjes së Denkov u paraqit në parlament.
Nuk është ende e qartë se kur parlamenti do të votojë për dorëheqjen e Denkov dhe qeverisë që ai drejtoi.
“Qeveria do të vazhdojë aktivitetin e saj… derisa të zgjidhet një qeveri e re”, tha Denkov në një fjalim.
Masa i hap rrugën ish-komisioneres evropiane dhe ish-zëvendëskryeministres Mariya Gabriel, nga partia e qendrës së djathtë GERB, për të zënë vendin e Denkov.
Denkov, nga partia centriste ”Vazhdojmë Ndryshimin” (PP), tani është vendosur të bëhet zëvendës i Gabrielit.
Pas zgjedhjeve parlamentare të vitit të kaluar, dy partitë politike dominuese arritën një marrëveshje për ndarjen e pushtetit në të cilën do të ndërrohej posti i kryeministrit.