Kryeministri i Territoreve Palestineze, Mohammad Shtayyeh dha sot dorëheqjen në Ramallah.
“Presidenti palestinez, Mahmoud Abbas thuhet se ka kërkuar dorëheqjen pas presionit nga vendet arabe në rajon dhe Shtetet e Bashkuara të Amerikës”, sipas një raporti të transmetuesit Watan TV, i cili citoi zyrtarët qeveritarë.
Lëvizja shihet si një hap drejt arritjes së paqes në Lindjen e Mesme duke reformuar Autoritetin Palestinez (PA) për të qeverisur Gazën pasi të përfundojë lufta.
Dorëheqja e Shtayyeh shihet si një hap mjaft simbolik, pasi hap derën për qëllimin e një zgjidhjeje me dy shtete megjithëse mbeten shumë pengesa.
Shtayyeh, i cili konsiderohet një bashkëpunëtor besnik i Abbas, ka qenë në pushtet që nga viti 2005 dhe do të vazhdojë të shërbejë si kreu i një qeverie të përkohshme. Formimi i një qeverie të re mund të zgjasë disa javë ose muaj.
Suksesi i saj do të varet kryesisht nga lufta në Rripin e Gazës, nëse ajo mund të përfundojë apo nëse mund të arrihet një tërheqje e mbikëqyrur ndërkombëtarisht e forcave izraelite nga zona bregdetare.
Autoriteti Palestinez, nën udhëheqjen e Abbas, administron disa pjesë të Bregut Perëndimor të pushtuar nga Izraeli.
Fraksioni më i rëndësishëm brenda saj është lëvizja Fatah, e cila gjithashtu udhëhiqet nga Abbas.
Organizata militante palestineze Hamas, e cila po bën luftë kundër Izraelit në Gaza, nuk është anëtare.
