Dy deputetët e Vetëvendosjes, Rexhep Selimi e Liburn Aliu kanë vizituar vëllëzërit Ramadani të cilët Presidenti i Kosovës, Hashim Thaçi gjatë të premtës me dekret ua fali dënimin. Aliu thotë se procesi për të cilin vëllëzërit Ramadani ishin dënuar ka qenë i montuar.
“Procesi në të cilin u dënuan ishte i montuar dhe ata u dënuan pa asnjë provë”, shkruan Aliu.
Ai thotë se lajmi për lirimin e tyre i gëzoi shumë por beteja për drejtësinë sipas tij “nuk përfundon këtu”.
“Vënia në vend e drejtësisë përmes një rigjykimi është domosdoshme”, thotë më tej ai.
“Kosova do të bëhet shtet i së drejtës atëherë kur të ndalojnë proceset e montuara dhe kur të gjithë të burgosurit e pafajshëm të lirohen. Kjo ditë nuk është larg”, ka shkruar Aliu.
Burim e Arsim Ramadani dhe Arben, Blerim e Jeton Kiçina ishin shpallur fajtorë nga Gjykata e Qarkut dhe ajo Supreme për vrasjen e pesë anëtarëve të familjes Hajra në vitin 2001. Ata ishin dënuar me nga 30 vjet burg./Kosova Post/
