Më shumë se 200 emigrantë janë kapur në brigjet e Kretës dhe janë dërguar në vend të sigurtë brenda 48 orëve të fundit, sipas rojes bregdetare greke.
Emigrantët me sa duket ishin nisur nga rajoni i qytetit port libian të Tobrukut.
“Kontrabandistët po bëjnë biznes fitimprurës”, tha një oficer i rojes bregdetare në radion greke ERT.
Sipas emigrantëve, kontrabandistët marrin deri në 6 000 euro për person për kalimin në Kretë.
Zëvendësministrja greke për Migracionin, Sofia Voultepsi, tha për radion greke se problemi i të ashtuquajturës rrugë jugore nga Tobruku në Kretë po bëhet gjithnjë e më serioz.
Sipas ministrit të Migracionit, Nikos Panagiotopoulos, shumica e emigrantëve që mbërrijnë në Greqi planifikojnë të udhëtojnë drejt Gjermanisë dhe vendeve të tjera të Evropës Perëndimore sapo të kenë mundësinë ose pasi të kenë marrë azil në Greqi.
Rreth 52 000 emigrantë kanë mbërritur në Greqi që nga fillimi i vitit deri më 10 nëntor, 45 769 prej tyre mbërritën nga deti, sipas agjencisë së refugjatëve të Kombeve të Bashkuara (UNHCR).
