Kreu i Agjencisë Turke për Menaxhimin e Fatkeqësive dhe Emergjencave (AFAD), Mehmet Gulluoglu, ka njoftuar se mbi 6 mijë civilë që ikën nga Guta Lindore janë vendosur në zonën e “Mburojës së Eufratit”.
“Afërsisht 1.080.000 sirianë aktualisht jetojnë në zonën e Mburojës së Eufratit dhe 193.723 prej tyre janë në kampe”, tha Gulluoglu për Agjensinë Anadolli.
Operacioni turk “Mburoja e Eufratit”, i nisur në fund të vitit 2016, çliroi qytetin Al-Bab të veriut të Sirisë nga grupi terrorist DEASH. Operacioni i cili përfundoi në mars të vitit të kaluar, kryesisht pati sukses në pastrimin e zonës nga grupi terrorist DEASH.
Gulluoglu tha se të paktën 130 mijë persona janë evakuuar nga Guta Lindore që kur procesi i evakuimit filloi më 22 mars dhe AFAD ka bërë çmos për të strehuar njerëzit e zhvendosur.
“Ekipet nga Ministria e Shëndetësisë kanë kryer kontrolle shëndetësore të atyre që u vendosën në kampe, ndërsa organizata të ndryshme joqeveritare sigurojnë ushqim, ushqim të nxehta dhe pajisje të tjera bazë”, tha Gulluoglu.
“Për të përmbushur nevojat e tyre, deri më tani 3.142 kamionë të ndihmave humanitare janë dërguar nga depoja logjistike e AFAD-it në Cobanbey”, shtoi ai.
Güllüoğlu tha se strehimoret janë duke u ndërtuar për 32 mijë njerëz në zonën e “Mburojës së Eufratit” dhe për 3.350 njerëz në Idlib.
Më 24 shkurt, Këshilli i Sigurimit i OKB-së miratoi njëzëri Rezolutën 2401, e cila bëri thirrje për një armëpushim në Siri, veçanërisht në Gutën Lindore, për të lejuar dhënien e ndihmës humanitare.
Megjithatë, pavarësisht rezolutës regjimi dhe aleatët e tij në fillim të marsit nisën një ofensivë të madhe tokësore, mbështetur nga forcat ruse, që synonin kapjen e pjesëve të rrethit të mbajtura nga opozita.
Sipas burimeve lokale të mbrojtjes civile, që nga 19 shkurti, më shumë se 1.400 persona janë vrarë në sulme nga regjimi dhe aleatët e tij në Gutën Lindore.
Guta Lindore, shtëpi e 400 mijë banorëve, ka mbetur nën rrethimin e regjimit gjatë pesë viteve të fundit, gjë që ka penguar dhënien e furnizimeve humanitare të nevojshme.
Siria sapo ka filluar të dalë nga një konflikt shkatërrues që filloi në fillim të vitit 2011, kur regjimi u përplas me protestuesit me një trazirë të papritur.
Sipas zyrtarëve të OKB-së, deri më sot qindra mijëra njerëz janë vrarë në konflikt./Rtv Islam/
