Ministri i Financave, Punës dhe Transfereve, Hekuran Murati, sot deklaroi se duhet të sqarohet se tatimi në pronë si tatim, është tatim që mblidhet nga komunat dhe janë të hyra komunale, pra komunat i përdorin ekskluzivisht për t’iu ofruar shërbime dhe infrastrukturë qytetarëve në komunat ku jetojnë.
Murati u shpreh se kjo gjë duhet të sqarohet pasi siç tha, ka pasur pretendime se Qeveria ka rritur tatimet për të rritur të hyrat, por, kjo sipas tij, nuk ka ndodhur.
Sa i përket çështjes së tatimit në pronë, Murati tha se deri tani janë marrë dy vendime apo udhëzime administrative.
“E para ka qenë për formimin, pra udhëzimi administrativ për këshillin mbikëqyrës për licencim të vlerësuesve të pronave të paluajtshme, që është marrë apo është nënshkruar nga ministri i Financave dhe është bërë me datën 15 shtator të vitit 2021 dhe s’ka të bëjë fare pra me çështjen në fjalë të faturave të tatimit në pronë. Vendimi tjetër që është marrë ka qenë udhëzimi administrativ i miratuar me datën 1 nëntor të vitit 2021 që ka pasur të bëjë me pezullimin e shërbimeve komunale për tatim-paguesit në pronë e që me fjalë tjera ka qenë, nëse ju kujtohet ai vendimi për të heqë obligimin që qytetarët e kanë pasë të pagujnë tatimin në pronë në mënyrë që të mundësohet regjistrimi i veturës, domethënë kjo është bërë në nëntor të vitit 2021.”, tha ai, duke shtuar se si qeveri çka kanë ndërmarrë deri më tani në këtë aspekt ka qenë si ta lehtësojmë jetën e qytetarëve.
Ministri tha se ligji i miratuar në vitin 2018 për tatimin në pronë, ishte i miratuar nga qeveria Mustafa në vitin 2017, kur ministër ishte Avdullah Hoti, por tha se ky ligj s’ishte miratuar në Kuvend sepse qeveria kishte rene. Ai u shpreh se ligji i njëjtë ishte proceduar në qeverinë Haradinaj disa muaj më vonë, me këtë rast ishte miratuar dhe në janar të vitit 2018 kishte hyrë në fuqi.
Murati u shpreh se ky ligj i ka përcaktuar disa afate dhe disa kushte që obligojnë institucionet e vendit të respektohen.
“Domethënë ky ligj i miratuar në vitin 2018 ka paraparë që sipas nenit 7 të këtij ligji, në vitin e pestë të zbatimit të ligjit, të hyjnë në fuqi tatimi 100 për qind i tokave, domethënë më përpara s’ka qenë tatimi tokave, prej hyrjes në fuqi të këtij ligji ka filluar të tatohen edhe tokat, sepse njëherë kanë qenë vetëm ndërtesat. Pra, që nga viti 2018 e këtej kanë filluar të tatohen edhe tokat dhe viti i pestë, pra viti 2023 është kur tatimi në toka aplikohet në vlerën 100 për qind. Domethënë këta e obligon ligji. Dhe nuk është marrë asnjë vendim, as nuk ka pasur nevojë të merret asnjë vendim, sepse ky ligje ka përcaktuar që në vitin 2018 që tokat duhet të tatohen. Dhe, pjesa më e madhe e rritjes së faturave pra shkon nga ky tatim për shkak se tatimi në tokë, pra një pjesë e madhe që nuk janë tatuar në të kaluarën ose janë tatuar me norma të reduktuara sipas nenit 7 të ligjit të miratuar në vitin 2018, në vitin 2023 aplikohet me automatizëm tatimi i ri”, nënvizoi ai.
Ai shtoi se arsyeja e dytë ka të bëjë edhe me vlerësimin e pronave rezidenciale, por edhe me shkallët tatimore.
Ministria e Financave, Punës dhe Transfereve, të martën ka reaguar lidhur me çmimin e rritjes së tatimit në pronë. MF ka potencuar se tatimi në pronë është tatim, i cili mblidhet nga komunat dhe përbën njërin nga burimet kryesore të hyreve vetjake për komunat.
Për shtrenjtimin e tatimit në pronë, ditëve të fundit ka pasur kritika nga deputetë të opozitës dhe qytetarë.
