Seanca për caktimin e masës së sigurisë ndaj shtatë deputetëve të Vetëvendosjes nis pasdite.
Deputetët e ndaluar të Vetëvendosjes lidhur me hedhjen e gazit në Kuvendin e Kosovës, sot në orën 13 do të dalin para gjyqtarit për caktimin e masës së sigurisë ndaj tyre.
Lajmin për KALLXO.com e ka konfirmuar Mirlinda Gashi, zëdhënësja e Gjykatës Themelore në Prishtinë.
Deputetët Arbërie Nagavci, Drita Millaku, Fitore Pacolli, Liburn Aliu, Valon Ramadani, Salih Zyba dhe Xhelal Sveçla u arrestuan të merkurën nën dyshimin se hodhën gaz lotsjellës në seancën e Kuvendit.
Atë ditë deputetët e Vetëvendosjes hodhën gaz katër herë duke tentuar ta pamundësojnë votimin e marrëveshjes për demarkacion.
Prokuroria ka kërkuar paraburgim për shtatë deputetët, ndërsa Vetëvendosja lirimin e tyre.
