Ministri i Punëve të Jashtme të Kosovës, Behgjet Pacolli, ka njoftuar se gjatë ditës së sotme, Komiteti Ekzekutiv i INTERPOL-it me seli në Lyon të Francës ka debatuar rreth aplikimit të Kosovës në këtë organizatë.
Sipas ministrit Pacolli, ky Komitet ka vendosur në favor të dërgimit të dosjes së Policisë së Kosovës për votim në Asamblenë e Përgjithshme të INTERPOL-it.
Këtë e ka bërë të ditur ministri Pacolli përmes një postimi në Facebook, ku ndër të tjera i bënë thirrje Serbisë që ta thërret zërin e arsyes e të mos veproj me obstruksionet e saj kundër paqes dhe sigurisë.
Postimi i plotë i Pacollit:
Gjatë ditës së sotme, Komiteti Ekzekutiv i Interpolit me seli në Lyon (Francë) debatoi rreth aplikacionit të Republikës së Kosovës dhe vendosi në favor të dërgimit të dosjes së Policisë së Kosovës për votim në Asamblenë e Përgjithshme të Interpolit, e cila këtë vit do të mbahet në Kili.
Policia e Kosovës, u cilësua në nivelin më të lartë të profesionalizmit dhe kredibilitetit, si organizatë policore moderne dhe me standarde të avansuara.
Përbërja e Komitetit Ekzekutiv për vitin 2019 nga gjithsej 10 shtete pjesëmarrëse, në debatin e sotëm, ishin vetëm tri shtete të cilat e kanë njohur pavarësinë e vendit tonë dhe pothuajse të gjithë pjesëmarrësit argumentuan në favor të aplikacionit të Policisë së Kosovës për të proceduar më tutje në Asamblenë e Përgjithshme.
Prandaj, urojmë që edhe Serbia të i thërret zërit të arsyes dhe të mos veproj me obstruksionet e saj kundër paqes dhe sigurisë.
Do të ishte primitive dhe jashtë çdo logjike, pengimi dhe lobimi kundër antarësimit të Policisë së Kosovës në organizatën ndërkombëtare të Interpolit, dhe në anën tjetër të flasësh për paqe dhe siguri.
